Koldo Sanchezek bere burua aurkeztu du Nafarroako Auzitegian. Duela bost urteko txupinazoan izandako istiluen harira, hiru urte eta erdiko zigorra bete beharko du Zizur Nagusikoak (Nafarroa). Hainbat lagunek elkarretaratze bat egin dute auzitegiaren atarian, zigortuari babesa emateko. Salatu dute ikurrina ateratzeagatik sartuko dutela espetxera Sanchez. Hori dela eta, Ikurren Legea bertan behera uzteko eskatu dute, eta herritarrei dei egin diete datozen sanferminetan ikurrina eta Nafarroako bandera erabiltzera, txupinazoan batez ere.
Duela bost urteko San Fermin bezperan gazte batzuek Udaletxe plazara ikurrin erraldoi bat sartu zutenean gertatu ziren liskarrak. Iruñeko udaltzainak indarkeria handiz sartu ziren plazara, eta ikurrina zeramatenei oldartu zitzaizkien, borrekin. Jose Carlos Arranz gazte espainiarrari xanpain botila bat burura erori zitzaion. Arranz 47 egunez egon zen ospitalean, larri, eta 426 egun eman zituen osatzen —31 urte zituen orduan—.
Nafarroako Auzitegi Nagusiak hiru urte eta erdiko kartzela zigorra ipini zion Sanchezi. Auzitegiak dio lesio horiek eragiteaz gain atentatu delitua eta ordena publikoaren aurkako falta bat ere egin zuela.
Beste sei gazteri ere ezarri zieten espetxe zigorra, istiluetan parte hartu zutela leporatuta: Sergio Cañamero eta Asier Huarteri, urtebete eta launa hilabetekoa; Bordat Arrizibita, Aitor Idiazabal, Jesus Barkos eta Unai Ruiz de Escuderori, urtebete eta bina hilabetekoa.
Aitor Solari, Nahia Ojetari, Ibai Morenori, Joseba Alfonso Erizeri eta Imanol Salinasi ere ipini zien zigorra Nafarroako auzitegiak: sei egunez une oro lokalizatuta egon beharra daukate, eta hamabosna eguneko isuna jaso dute —eguneko, hogei eurokoa—.
