"Kolore politiko anitzeko" manifestazio jendetsu eta alaia egin dute Baionan, Bateraren aldarrikapenekin bat eginez

'Euskal Departamendua, Euskararen Koofizialtasuna, Laborantza Ganbera eta Unibertsitatea'. Lau aldarrikapen horiek aurrean hartuta abiatu da gaur arratsaldeko lauak paseak zirela Baionako tren geltokitik Batera ekimenak deitutako manifestazioa. Jende ugari hurbildu da Lapurdiko hiriburuko karrikak zeharkatzera, tartean, kolore politiko anitzeko alderdietako kideak: Joseba Egibar (EAJ), Joseba Permach (Batasuna), Patxi Zabaleta (Aralar), Abertzaleen Batasuneko ordezkari ugari, berdeak, UDFkoak eta beste hainbat gizarte eragiletako kideak, besteen artean. Arratsaldeko sei eta erdietan amaitu da ibilaldia, eta ekitaldiko komunikatua irakurri ondoren, eztabaidarako proposatzen dituzten ildo estrategikoen berri ematen zuen afixa banatu dute.