Konponbide integralaren aurkako jo ditu atxiloketak Batasunak

Atxiloketen inguruko balorazio desberdinak egin dituzte alderdi politikoek. Batasunak «gatazkaren konponbide integralaren kontrako» jo ditu, eta Frantziako Estatuari egotzi dio «Aieteko bake konferentzia burutu zenetik hari muzin eginez errepresioarekin jarraitzea». Gipuzkoako Diputazioak ere gisa berean hitz egin du: «Espainiako eta Frantziako estatuek ez dute oraindik gatazka konpontzeko jarrera». Euskal Herriko gatazkaren konponbide integralaren aldeko mugimenduak konponbidearen alde ez egitea ere egotzi die estatuei: «Errepresio mota guztiak bertan behera uztera behartu behar ditugu, aterabide politiko batean parte hartzera behartuz».

EAJren BBBko buru Andoni Ortuzarrek, bestalde, «normaltzat» jo du «hilketak egin dituztenak» atxilotzea. Hala ere, epaiketa justua eskatu du, eta atxilotuei egozten zaizkien delituak frogatu egin behar direla dio.

Erabat jarrera ezberdina izan dute PPk, PSE-EEk eta Eusko Jaurlaritzak. Atxiloketena «berri ona» dela esan, eta Poliziaren lana txalotu dute. Jaurlaritzako bozeramaile Idoia Mendiak polizien elkarlanaren adibidetzat jo ditu. «Poliziak funtzionatzen» jarraitzen duela eta «justizia» egingo dela nabarmendu du PSE-EEk. Eta PPk azpimarratu du Espainiako Gobernuak ETA desegitea lortuko duela.