Sortuko Kontseilu Nazionalak Arkaitz Rodriguez proposatu du alderdiko idazkari nagusirako, Arnaldo Otegiren ordez, BERRIAk jakin duenez. Joan den ekainean, EH Bilduko oinarriek Otegi hautatu zuten koalizioko koordinatzaile nagusirako, eta Sortun zuen kargua Kontseilu Nazionalaren esku utzi zuen Otegik. Ordutik, behin-behinean zegoen Sortuko idazkari nagusi gisa. Bi karguen arteko bateraezintasuna konpontze aldera, Sortuko Kontseilu Nazionalak gaur egindako bileran aho batez erabaki du Arkaitz Rodriguez proposatzea idazkari nagusi izateko, gaur egun alderdiko Ekintza Politikoko idazkari dena.
Sorturen I. Konferentzia Politikoak berretsi beharko du orain erabaki hori. Datorren larunbatean bilduko da Konferentzia Politikoa, Iruñeko Refena erakustazokan.
