"Kontsentsurik eza eta zeharbidea" erabiltzea leporatu dio EAJk PPko Gobernuari

EAJren iritziz, Aznarren Gobernua "aztarna faxista" ezartzen ari da Espainiako Zigor Zuzenbidean, Zigor Kodearen aldaketaren iragarpenarekin. "Alde batetik, atzean inolako adostasunik ez duen proposamena da eta Zigor Kodea, Estatuaren indar behartaraztearen adierazpen nagusia izanik, bere aldaketak kontsulta eta adostasuna behar" duela esan du Emilio Olabarria legelari eta EAJko parlamentarioak.

Zigor Kodearen "ezohikotasuna urratzen" duela salatu dute, izan ere, "gizarte arazoa konpontzeko azken neurria" da zuzenbidean. "Presaka eta Zigor Zuzenbideari ez dagokion prozedimendua erabiliz" egindako aldaketa dela ere erantsi du Xabier Arzalluzek, baina gogorren salatu dutena "balizko zigorraren neurrigabekeria" izan da.

Arzalluzen esanetan, izaera demokratikorik argiena duen ekintzari ezarri nahi zaion zigorra, adingabekoen prostituzioa, prebarikazioa, tortura edo antzeko delituei ezarritakoa baino handiagoa da. Arzalluzen arabera, Espainiako Zuzenbidearen historian geldituko den aldrebeskeria izango da.