Koskoenea gaztetxean zeuden zazpi lagunak absolbitu egin dituzte

Iazko ekainean Portugaleteko Koskoenea gaztetxea (Bizkaia) hustu zutenean identifikatutako zazpi lagunak absolbitu ditu Barakaldoko Lurralde Auzitegiak. Okupazioaren esparruan zigor arlotik azken urteetan bideratutako lehen auzian, ia 10.000 euroko isuna eskatu zuten gazteentzat, okupazio delitua egotzita. Baina epaileak ebatzi du ez zela halakorik gertatu, «eraikina hutsik eta erabili gabe egon zelako, gutxienez hamar urtez». Halaber, argudiatu du gaztetxekoek ez zutela gauzatu «eraikinaren jabetza materiala ekarriko lukeen ekintzarik».