Kukutzakoa auzi «publikoa» dela erantzun diote auzo elkarteek Azkuna alkateari

Kukutza gaztetxea eraisteko aginduak sortutako ezinegona Bilboko «arazo publikoa» dela erantzun diote hiriko auzo elkarteek Iñaki Azkuna alkateari. Herenegun udaleko buruak esandakoaren aurka egin dute, horrenbestez, auzo elkarteek; Azkunak adierazi zuen «arazo pribatu bat» zela gaztetxearena, eta Bilborentzat ez duela «lehentasunik» Kukutza ez botatzeak. Bestela uste dute auzo elkarteek: «Arazo publikoa da, soluzioa posible da, eta, gainera, ez luke diru xahutzerik eragingo bilbotarrentzat».

Elkarteek agiri batean adierazi dute Errekalde auzoan ezinbesteko dela Kukutzaren gisako eremu bat. «Jasotako babesak erakusten du Kukutza nahi dutela auzotarrek». Lehenago proposatu izan duten irtenbidea jarri dute mahai gainean elkarteek: udalak beste eremu bat eskaintzea Kukutzaren jabetza duen enpresari. Gainera, Azkunari gogoratu diote udalak berak izendatu zuela eraikina urbanizagarri auzotarrak horren aurka bazeuden ere.