Andoaingo Martin Ugalde Kultur Parkean izan da Iñigo Lamarca Euskal Autonomia Erkidegoko arartekoa, Korrikaren 18. edizioaren hasieran. Euskararen aldeko ekimenari babesa azaldu dio, "herritar gisara eta batez ere ararteko gisa".
Nabarmendu duenez, bere betebeharra da, arartekoa den aldetik, giza eskubideak defendatzea, "eta honek lotura zuzena dauka euskal hiztunen eskubideekin". Azaldu du euskara "egoera gutxitu batean" dagoela eta euskaldunen eskubideak sarri ez direla bermatzen: "Bi hizkuntza dira ofizialak, baina euskal hiztunen eskubideak ez daude behar bezala babestuta. Inportantea da euskara plazaratzea, eta horretarako Korrika tresna ezin hobea da".
