Langabezia eta pobrezia egoerak Lanbidera jotzen duen jende kopurua handitzea ekarri du, eta hara jotzen duten erabiltzaileei ez zaie zerbitzu duinik ematen, Lanbide bera jasaten ari den egoera dela-eta, sindikatuek salatu dutenez. Azken urteotan Eusko Jaurlaritzak egindako murrizketen ondorioz, gizarte zerbitzuek, Lanbide zerbitzuaren kalitateak eta bertako langileen lan baldintzak “okerrera” egin dute. Hala adierazi dute ELA eta LAB sindikatuek eta Bizkaiko hainbat eragile sozialek Bilboko Alameda Mazarredo auzoko Lanbideren bulegoaren aurrean egindako agerraldian. Elkarretaratzea egin dute bertan.
Leire Trigueros LAB sindikatuko ordezkariak egin du salaketa: “Hutsik dauden lanpostuak ez dira betetzen, lan-baldintzak okerrera egin dute, ez dago erabiltzaileentzako informazio zerbitzurik, eta ez dute Lanpostuen Zerrenda egokirik onartu nahi”. Horrek guztiak, zerbitzu publiko horren kalitatea jaitsi duela esan du.
Eusko Jaurlaritzaren Enplegu eta Gizarte Politiketako Sailean hartutako erabakien ondorioz, gizarte larrialdietarako laguntzetara bideratutako aurrekontua 6 hilabetean amaitu da. Ondorioz, 20.000 familiari laguntza horiek jasotzeko aukera kenduko dietela adierazi dute. Horrez gain, laguntza sozialak jaso ahal izateko baldintzak “gogortu” dituztela salatu dute, eta, diotenez, murritzegia da Lanbideko langile kopurua horri erantzuteko.
Murrizketak bertan behera utzi eta kalitatezko enplegu zerbitzu publikoa eskaintzeko eskatu dute. Datorren asteartean, hilaren 12an, Bilboko Eusko Jaurlaritzako egoitzaren aurrean elkarretaratzea egingo dute.
