Iazko abenduko datuak ezagutu ziren atzo, eta hilabete horretako bilakaera ere ez zen oso baikorra izan. Hego Euskal Herrian, azaroan baino 1.044 langabetu gehiago egon ziren urtearen azken hilabetean. Guztira, INEMen izen emandakoak 97.263 ziren. Nafarroan egin zuen gora gehien langabeziak abenduan: abenduan baino 1.031 langabe gehiagok eman zuen izena Inemen. Gipuzkoan, berriz, 434 izan ziren abenduan langabeziara joan zirenak. Araban mantendu egin zen kopurua, eta Bizkaian jaitsi: azaroan baino 421 langabe gutxiago egon ziren.
Langabezia tasa %6,6koa izan zen, horrenbestez, 2006an Hego Euskal Herrian. 2005ean baino ia bi puntu beheragotik amaitu zen iazko urtea, orduan %8,02koa baitzen tasa.
HAINBAT INTERPRETAZIO. «Zoriontzekoa da» datu hori, sindikatu batzuen aburuz. Hala adierazi dute CCOO eta UGT sindikatuek urte bukaerako datuak ezagutu ostean.Batik bat, egin diren kontratu motarengatik daude gustura bi sindikatuok.
Nahiz eta %90 aldi baterakoa izan, «kontratu finkoak gero eta gehiago egiten ari dira, eta horrek argi erakusten du sindikatuek eta patronalak iritsitako akordioak onak direla». 2005ean egindako kontratuen %7 izan dira finkoak; 2006an, berriz, %9,40. «Ia 3 puntu hobetu dugu kontratu finkoen portzentajea, eta hori txalotzekoa da», esan du Loli Garcia CCOO Euskadiko enplegu arduradunak. Halere, Espainiako datuarekin alderatuz «asko dagoela hobetzeko» onartu du Garciak, bertan %60 hazi baita kontratu finkoen kopurua.
UGTko ordezkari Felipe Garciaren ustez, «hobekuntza hau sindikatu batzuek administrazioarekin egindako elkarlanari esker lortu da». Horrekin batera sindikatu abertzaleak kritikatzeko ere aprobetxatu du: «ELA, LAB eta Eusko Jaurlaritzak trabak jarri dituztelako ez dira lortu datu hobeak, elkarrizketa trabatu dutelako».
