Nafarroako Gobernuak eta Eusko Jaurlaritzak bi erkidegoen arteko harremanak sendotzeko lankidetza protokoloa sinatuko dute datorren astean. Iñigo Urkullu Jaurlaritzako lehendakariak eta Uxue Barkos Nafarroako presidenteak izenpetuko dute, maiatzaren 10ean, Gasteizen. Eusko Jaurlaritzak atzo onartu zuen hitzarmena gobernu kontseiluan, eta gaur onartu du Nafarroako foru gobernuak.
Dokumentuak elkarlanerako 18 arlo bereizten ditu. Besteak beste, gizarte zerbitzuak, genero berdintasuna eta emakumearen aurkako indarkeria, osasuna eta kontsumoa, hizkuntza politika, bakea eta bizikidetza, hezkuntza eta kultura, eta ogasuna eta finantza-politika. Esparru bakoitzean asmo eta helburu orokorrak adostu dituzte bi gobernuek, eta Josu Erkoreka Jaurlaritzako bozermaileak adierazi duenez, horien garapenerako "tresna juridiko zehatzagoak" sortu beharko dira, arlo bakoitzeko talde teknikoak biltzen hasten direnean.
Akordioaren helburua "herritarrei zerbitzu hobea" eskaintzea da, Erkorekak azaldu duenez, eta 2009ko uztailean bi gobernuek elkarlanerako izenpetu zuten hitzarmena "eguneratu eta zabaltzea". Elkarlanerako asmoen artean aipatu ditu herritarrek gutxieneko diru sarrera bermatzeko eskubidea ez galtzea erkidego batetik bestera leku aldatzerakoan, euskararen sustapenerako plan bateratua, EITB Nafarroan ikusi eta entzun ahal izateko beharrezko ekinbideak bultzatzea, emakumeen indarkeriaren kontrako protokolo bateratua, Osakidetza eta Osasunbideren arteko oinarrizko koordinazioa, elkarbizitza sendotzeko programa bateratuak eta Espainiako Gobernuaren "asmo zentralizatzailearen aurrean", Kontzertu Ekonomikoa eta Nafarroako Ituna defendatzeko lankidetza.
