Arnaldo Askatu Herri Ekimenak larunbat honetarako manifestaziora deitu du, Otegiren eta Bateragune auziko beste lau lagunen aurka Espainiako Auzitegi Gorenak hartutako erabakia salatzeko. Elgoibarren izango da martxa, plazan abiatuta 17:00etatik aurrera, Arnaldo askatu politika askatu! eta Euskal Herriak politika egiteko eskubidea lelopean.
"Epai honek ez du inolako zentzurik, eta bake prozesuaren aurkako eraso zuzena da", esan du gaur arratsaldean Elgoibarko herri ekimenak ohar baten bidez. "Beraz, guztiok animatu nahi zaituztegu Elgoibarko plaza betetzera, Arnaldo eta besteak askatzeko! Arnaldok dioen bezala, egin irribarre, irabazi egingo dugu eta".
