Jose Ramon Lopez de Abetxuko gasteiztarra eta gaixo dauden beste hainbat preso aske uztea "premiazkoa" dela aldarrikatu dute gaur, Gasteizen. Artium museoaren parean dagoen eskultura bati lotuta, ohe bat jarri dute zintzilik, horretan gaixo bat zegoela irudikatuz, eta, azpian, Jose Ramon Lopez de Abetxuko askatu! SOS Preso gaixoak zioen pankarta.
Lopez de Abetxukok 64 urte ditu, eta 24 urte egin ditu espetxean. Kartzelan daraman denbora gehiena gaixo eman du: bihotzeko gaitza dauka, hainbat ebakuntza egin dizkiote, eta gaixotasun degeneratiboak ditu. Villabonako kartzelan (Asturias, Espainia) dago egun.
Azaldu dute azken hilabeteetako egoeraren ondorioz "alarma guztiak" piztu direla, eta "gobernuen mendeku nahia hainbat preso politikoren bizitza arriskuan jartzera" heldu dela. Halere, ez daude soilik Lopez de Abetxukoren egoerarekin arduratuta. Ventura Tome, Txus Martin, Aitzol Gogorza eta Ibon Fernandez Iradi presoen egoera "larria" ere ohartarazi dute.
Horren harira, Sarek larunbaterako antolatu duen manifestazioan parte hartzera deitu dute. Gaixo dauden presoak aske uzteko eskatuko dute Gasteizko kaleetan. Arratsaldez egingo dute manifestazioa, Leizaola plazatik 19:00etan irtenda.
