Lau gizonezko atxilotu ditu Ertzaintzak azken 24 ordutan, bikotekideari eraso egin diotelakoan, Eusko Jaurlaritzaren Herrizaingo Sailak jakinarazi duenez. Gaur goizaldean Gasteizen atzeman dute bat, eta gainerako hirurak atzo Bizkaian -Santurtzin, Erandion eta Durangaldean-.
Gasteizen, 26 urteko gizonezkoa atxilotu du Ertzaintzak, emazteari eraso egin diolakoan. Emakumeak berak deitu dio Ertzaintzari erasoa salatzeko, Herrizaingo Sailaren arabera. Senarrak aurpegian kolpatu du eta iletik gogor tira egin dio, emakumearen kontakizunaren arabera. Gizonezkoa iazko irailean ere atxilotu zuen Ertzaintzak, emaztea erasotu zuelakoan.
Santurtzin, atzo arratsaldean gertatu zen erasoa, Ertzaintzaren arabera. Gizonezko batek bikotekideari eraso egin eta dirua eskatu zion, iturri berberak dioenez. Biktimaren alabak hots egin zion Ertzaintzari.
Bizkaiko bigarren atxiloketa Durangaldean gertatu zen -Herrizaingo Sailak ez du zehaztu zein herritan-. Ustezko erasotzailea 53 urteko gizonezkoa da. Ertzaintzak etxean bertan atzeman zuen, eta bikotekidea ospitalean artatu behar izan zuten, Herrizaingo Sailak dioenez.
Azkenik, Erandion atxilotu zuten hirugarrena. 36 urteko gizonezkoari bikotekideari heriotz mehatxuak egin izana leporatu diote.
Emakumeen aurkako indarkeria
Lau gizonezko atxilotu dituzte Araban eta Bizkaian, bikotekideari eraso egin diotelakoan
Iruzkinak
Ez dago iruzkinik
Ordenatu
