Beste urrats bat egin dute Nafarroako Ahal Dugu-ren zatiketan. Alderdiko Berme Batzordeak duela hilabete erabaki zuen Laura Perez idazkari nagusi ohi eta parlamentaria behin-behinean alderditik kanporatzea, eta, orain, berretsi egin du erabaki hori.
Estibaliz Martinez Berme Batzordeko presidentearen hitzetan, Perezek parlamentari akta itzuli behar du erabakiaren ondorioz, eta "alderdiaren izenean parlamentari gisa jarduteari utzi". Hilabeteko epea du Perezek helegitea aurkezteko. Gainera, alderdiko Herritar Kontseiluak astelehenean eskatu zien zuzendaritzarekin kritiko diren lau parlamentariei itzul dezatela akta.
Horiek horrela, Carlos Cousok hitz egin du, Nafarroako Parlamentuan Ahal Dugu-k duen taldeko bozeramaileak. Azaldu du Perezek talde parlamentarioan jarraituko duela: "Independenteak daude taldeetan, era guztietako figurak; ez dago arazorik horregatik". Zazpi parlamentari ditu Ahal Dugu-k parlamentuan, eta gehiengoa dira kritikoak: lau.
Halaber, Nafarroako alderdiaren egoera Galiziakoarekin eta Espainiako Estatuko leku batzuetakoarekin lotu du: "Ematen du Podemos hiltzen ari dela".
Dani Lopezek, Nafarroako Ahal Dugu-ko Antolakuntza idazkariak, prentsaurrekoa emango du arratsaldean, egoeraren berri emateko.
