Estatistikak ez dituzte bete Torrestrella (Cadiz, Espainia) ganadutegiko adardunek eta ez dute inor adarkatu sanferminetako lehen entzierroan. Santo Domingo aldapa ziztu bizian igo dute. Zezen beltz batek hartu du taldearen gidaritza eta Udal plaza baturik igaro dute.
Merkadereseko bihurgunea ere elkaturik pasa dute baina Estafeta kalean taldea sakabanatu eta luzatu egin da. Orduan ikusi dira lasterketa politak baina arriskutsuak ere. Pilaketak egon dira eta lasterkari askok zezenak ukitzen zituzten arren, zezenek ez dute ekiteko imintziorik egin.
Telefonicako zatian taldea iladan sartu da zezen plazara. Lehenak iristen bi zezen beltz izan dira eta atzetik etorri dira besteak joaldunekin batera. Dena dela, joaldun bat bidean gelditu da erorita eta ezin altxaturik. Unaiek lagundu behar izan dute ukuiluraino.
Lau zauritu, baina adarkadarik ez
Nafarroako Ospitaletako arduradunek azaldu dutenez, lau pertsona zauritu dira gaurko entzierroan, baina bakar bat ere ez adarkada jasota. Ez dira zauri larriak. Merkaderesen 35 urteko panamar bat zauritu da, sudurrean kolpe bat hartuta. Estafeta kalean bi espainiar zauritu dira, batek, 26 urteko gazteak, kolpea hartu du saihetsean; besteak, 40 urteko gizonak hainbat fraktura ditu saihetsean eta eskuineko sorbalda hezurrean. Telefonicako zatian beste espainiar batek kolpea jaso du begian.
