"Lehen kontaktua"

Euren arteko aurreneko bilera egin dute gaur Iñigo Urkullu EAJko Euzkadi Buru Batzarreko (EBB) lehendakariak eta Mariano Raxoi Espainiako PPko presidenteak, Madrilen, Espainiako Kongresuan, egoera politikoa eta ekonomikoa jorratzeko, eta bi alderdien harremanak "normalizatzeko". Ordu eta erdiz mintzatu dira, eta Urkulluk gero esan du EAJren eta PPren "lehen kontaktua" izan dela. "Sinesgarritasunean eta konfiantzan oinarritu behar den harremanaren hasiera baino ez da". Bilera "erosoa" izan da, haren arabera.

EAJk bere webean dio egoera ekonomikoa -krisialdia, lan erreforma, zerga politika, energia eta Kutxen Legea-, Espainiako Estatuko politika -aurrekontu orokorrak, "krisi instituzionala", Kataluniako Estatutua-, "euskal gizartean dagoen bizikidetza politiko giroa" -"bere burua ezker abertzaletzat daukan taldearen mugimenduak eta ETA, PP-PSE hitzarmena-, eta "hurrengo urteko hauteskundeetan eman daitezkeen mugimenduak" izan dituztela hizpide.

Alderdi jeltzalearen arabera, Urkulluk Raxoiri azaldu dio EAJk "gaitzespena" egiten diola Espainiako Alderdien Legeari. "Dena ez da ETA ezker abertzalearen munduan, eta ona da sentsibilitate guztiek hauteskundeetan parte hartzeko aukera izatea". EAJk EAEko Kontzertu Ekonomikoa "erabat" defenditzen duela ere azpimarratu dio, eta itun hori Espainiako Estatuan eta Europan babesteko eskatu dio.