Astelehen goizaldean hilurren iritsi zen gizona Bilboko Udaltzaingoaren egoitzara. Labanaz egindako eraso baten ondorio zela azaldu zuen, eta bikotekideari egotzi zion egilea izatea. Basurtuko ospitalera eraman zuten gizona larrialdi zerbitzuek; goiz erdialdera, han hil zen.
Udaltzainen arabera, gizonak esplikatu zien biak elkarrekin zeudela San Frantzisko auzoko etxe batean, eta hantxe eraso ziola andrazkoak, sastakada bat emanez.
Emakumea atxilotu egin zuen Udaltzaingoak. Atzo arratsaldean eraman zuten epailearen aurrera, eta hark libre utzi du behin-behinean. Udaleko iturriek ez dute xehetasun gehiago eman erabakiari buruz.
Andreak gizona salatu zuen maiatzean genero indarkeriagatik; Ertzaintzaren esku zegoen salaketa hori. Gizonak berak ere andrea salatua zuen.
