Londresko Auzitegi Gorenak atzera bota du Eneko Goieaskoetxea euskal presoaren (Gernika-Lumo, 1967) azken helegitea; Espainiaratzeko eskaeraren aurka Erresuma Batuko Justizian sar zezakeen azkena, hain zuzen. Londresko auzitegiak maiatzean erabaki zuen presoa Espainiara bidaltzea, horko Auzitegi Nazionalak hala eskatuta —ETArekin lotutako hamalau delitu egozten dizkio—. Aurki Espainiaratuko dute, Efe berri agentziak dioenez.
Goieaskoetxea iazko San Fermin egunean atxilotu zuten, Cambridgen (Erresuma Batua), ETArekin lotuta. Han bizi zen azken urteetan, izen faltsuarekin eta familiarekin.
Hil honen hasieran, egun batzuetako gose greba egin zuen Belmarsh-ko espetxean, lagun eta senideen bisitak jasotzeko izaten zituen arazoak salatzeko.
