Xabier Lopez Peña euskal presoa zenaren hilotzari harrera egiteko ekitaldia antolatu izana egotzita, Iker Rodrigo Sortuko Bizkaiko koordinatzaileordea atxilotu du gaur Guardia Zibilak. Lopez Peñaren familiak, ordea, jakinarazi du hari azken agurra emateko ekitaldiak "pribatuak" izan zirela eta senide eta lagunek antolatu zituztela.
"Asmo bakarra zen Xabierri harrera egin eta agurtzea,senide, lagun eta gertukoen errespetutik", azaldu du familiak: "Ez Sortuk eta ez beste erakunderen batek ez du zerikusirik izan Xabierren hileta zibilaren antolakuntzan".
Rodrigok ardurarik ez duela defendatu, eta hura aske uzteko eskatu diote Lopez Peñaren senideek Espainiako Auzitegi Nazionalari. Gainera, pertsona batzuek "Gora ETA" oihukatu izana soilik pertsona horien ardura dela defendatu du sendiak.
