Gogor mintzatu da Mikel Cabieces Espainiako Gobernuaren EAEko ordezkari eta PSE-EEko kide ohia Patxi Lopezen kontra. El Correo egunkarira bidalitako ohar batean esan du ez duela onartuko berak baino diru sarrera gehiago dituen norbaiten irakaspenik: "Ezta ere nik bezala iraganean eginiko lana eta dedikazioa egiazta ezin dezakeen inoren irakaspenik".
Lopezek igandean egin zituen adierazpenei erantzun die Cabiecesek; Eusko Jaurlaritzako lehendakari ohiak esan baitzuen ez zela "onargarria" hilero Kutxabanketik Cabiecesek jaso zuen dirua.
Espainiako gobernu ordezkari ohiaren iritziz, gaia ezagutu gabe eginiko adierazpenak dira Lopezenak, eta, gainera, kritikatu egin du haren familian jazo ziren antzeko beste zenbait auzitan isilik gelditu izana —Melchor Gil haren ezkon-anaiak ustezko zerga iruzur batekin izan zuen afera—.
Cabiecesek bere errugabetasuna aldarrikatu du ohar berean. Egin zuen "bekatu bakarra" autonomo gisa Kutxabankentzat abokatu lana egitea izan dela adierazi du.
Bihar, Kutxabanken bilera
Bihar erabakiko du Kutxabanken administrazio kontseiluak Cabiecesen kontra irekitako auzibidean salatzaile gisa azaldu edo ez. Ezohiko bilera batean hartuko dute erabakia.
