Gaur itzali dituzte dibidendu digitalaren frekuentzian dauden lurreko telebista digitalaren (LTD) kateak. Hori dela eta, antena egokitu ez dutenek edo telebistak berriz sintonizatu ez dituztenek ezingo dituzte kate horiek ikusi. Kable bidez telebista ikusten duten erabiltzaileei ez die eragingo.
Duela aste batzuk Maite Iturbe EITBko zuzendari nagusiak iragarri zuenez, ordea, Gipuzkoako eta Bizkaiko etxeen %10 inguru ETBko kateak ikusi gabe geldituko dira ez dituztelako antenak egokitu. Hasiera batean epea urtarrilaren 1ean ezarri zuen Espainiako Gobernuak, baina sektorearen eskaerak behartuta, gaur arte atzeratu zuten. Edonola ere, antenistek arazo ugari izan dituzte eskaerei aurre egiteko.
UTECA Espainiako Telebista Komertzial Irekien Batasunak adierazi duenez, bigarren etxebizitzak, pertsona edadetuenak edo arazo ekonomikoak dituzten komunitateak geratuko dira LTDko kateak ikusi gabe. Gastuei aurre egiteko, Espainiako Gobernuak diru-laguntzak emango ditu ekainaren 30a bitartean.
