Lurraldebus txartela Renfe enpresako aldiriko tren bidaiak ordaintzeko erabili ahal izango da astelehenetik aurrera. Gaur goizean eman du akordioaren berri Larraitz Ugartek, Gipuzkoako Foru Aldundiko Mugikortasuneko eta Bide Azpiegituretako diputatuak.
Oraingoz, Renfeko leihatiletan erabili ahal izango da txartela ordainketa gisa, eta, uztailaren 1etik aurrera, salmenta makinetan ere erabili ahalko da.
Sistema horren bidez, txartel arruntaz eta joan-etorriko txartelaz gain, hileko txartela ere erosi ahal izango da. Hitzarmenetatik kanpo geratu dira talde berezien Lurraldebus txartelak.
Erabiltzaileek Renferen tarifen arabera ordainduko dute, eta Lurraldebus txartelarekin ordaindutakoa gero aldundiak ordainduko dio Renferi.
Gipuzkoako Foru Aldundiak otsailaren 20an sinatu zuen Renferekin zerbitzu hori eskaintzeko akordioa, "herritarren mugikortasuna" bermatzeko asmoz.
