Maiatzaren 14an hasiko dira Deustuko kanala zabaltzeko obrak

Astebete barru abiatuko dituzte Bilboko Udalak eta Eusko Jaurlaritzak Zorrotzaurre irla bihurtzeko lanak. Jose Luis Sabas Lan eta Zerbitzuetako zinegotziak azaldu duenez, 20,9 milioi euroko aurrekontua izango dute, eta hamasei hilabete iraungo dute. Dena den, lehen bederatzi hilabeteetan obraren bi jarduera gauzatuko dituzte aldi berean: batetik, ura sartuko den gunetik lurra aterako dute, eta, bestetik, kanalaren bi aldeak lotzeko zubia jarriko dute. “Hala, Zorrotzaurre ez da inoiz komunikaziorik gabe geratuko. Horrek konplexutasuna gehituko die obrei, baina denbora eta eragozpenak laburtuko ditu”.

Itsasadarraren alde bakoitzean 500 metroko “kostalde gunea” irabaziko du Bilbok, Sabasen arabera; 365.000 metro kubiko lur aterako dituzte horretarako. Zubiak, berriz, 75 metroko luzera izango du, eta 30 metroko zabalera; espaloia izango du albo bietan, baita bidegorri bat ere, eta ibilgailuentzako lau bide, noranzko bakoitzean bina.

Eusko Jaurlaritzako Etxebizitza sailburuorde Covadonga Solagurenek erantsi du obren hasiera “mugarria” izango dela Zorrotzaurre “bere onera ekartzeko” prozesuan. “Ezin dugu ahaztu hondamen naturalen ondorioak gutxituko dituela egitasmoak”. Udalak BC3 ikerketa zentroari eskatutako azterlan batean oinarrituta adierazi duenez, %68 murriztuko dira kanala ireki osteko ehun urteetan uholdeek eragindako kalteak.