Maiatzaren 18rako herriz herri euskal presoen eskubideen aldeko mobilizazioak egitera deitu du Herrira mugimenduak. Agerraldi bat egin du gaur, Bilbon, eta bertan azaldu du "plaza guztietara" zabaldu nahi dutela Bilbon urtarrilaren 12an eta Baionan iazko azaroaren 10ean presoen alde eginiko manifestazioetan batu zen jendetza.
Ibon Meñikak eta Estitxu Garaik hitz egin dute agerraldian. Azaldu dute Bilbon eta Baionan erabilitako lelo bera izango dela maiatzaren 18ko protestetakoa —Giza eskubideak. Konponbidea. Bakea. Euskal presoak Euskal Herrira— eta mobilizazio horiek Herrira-ko 200 herri plataformak baino gehiagok antolatuko dituztela.
