Gizarteak euskal presoen eskubideak errespetatzeko nahia adierazi duen arren, Espainiako eta Frantziako Gobernuak "atzerantz" egiten ari direla salatu dute zortzi alderditako ordezkariek. Ainhoa Beolak adierazi du egoera horren aurrean herritarrek hartu behar dutela protagonismoa: "Jendartea osatzen dugun pertsona, sektore, eragile, alderdi, sindikatu, talde eta erakundeek badugu zer esan eta zer egin". Donostiako agerraldian izan diren ordezkarien arabera, hori izango da bidea gatazkak eragindako "ondorio guztiak" konpontzeko.
Bide horretan, espetxe politika aldatzeko eskatu diete Frantziari eta Espainiari. "Garaia da pertsona guztien oinarrizko giza eskubideak errespetatzeko", esan du Beolak. "Konponbide jokaleku" baterako urrats gisa, "premiazkotzat" jo dute gaitz larriak dituzten hamabost presoak aske uztea, sakabanaketa amaitzea eta 197/2006 doktrina bertan behera uztea. Hain zuzen, Europako Giza Eskubideen Auzitegiak ere doktrina hori indargabetzeko agindu zion, iazko uztailean, Espainiari.
Herriz herri, plazak betetzeko deia
Giza eskubideak. Irtenbidea. Bakea. Euskal Presoak Euskal Herrira. Lelo horrekin bete nahi ditu Herrira mugimenduak Euskal Herri osoko plazak. Dagoeneko, 200 herritan baino gehiagotan antolatu dituzte ekitaldiak egun horretarako, eta hainbat eragileren babesa jaso dute.
