Festaren ikurra eta leloa aurkeztu ditu Sortzen-ek gaur goizean, Iruñeko Antoniuttin eginiko agerraldian. "Iazko jaiaren protagonista izan zen Ikaskilo barraskiloak lagun berria izanen du aurten: Euskarakilo barraskiloa". Hori izanen da aurtengo ikurra, "slow" eskolaren balioei euskararen aldeko aldarria gehituta. "Auzo bizi onaren eskola eta hezkuntza burujabetza, hori da gure ametsa. Eta ametsa euskaraz ere badela aldarrikatzera datoz Ikaskilo eta Euskarakilo", azaldu du Sortzen elkarteko kide Aiora Epeldek.
Iazko ereduari jarraikiz, aurtengo Sortzen jaia ez du eskola bakar batek antolatuko. "Eskola anitzetako hezkuntza komunitateko kideek antolatuko dute jaia, gurasoek gehienbat, auzolanean eta lantaldeka".
EgunOn! izanen da aurtengo leloa, eguneroko hartu-emanetan lehen hitza euskaraz esateak duen garrantzia azpimarratzeko: "Egun on, mundu guztiak eguna euskaraz hasteak duen garrantziaren irudikapen gisa".
