Frantxua Maitia Euskararen Erakunde Publikoko presidenteak uste du gaur egungo Frantziako legediaren "interpretazio hertsia" ez dela egokia Ipar Euskal Herriko ikastolei lotutako inbertsio proiektuak aztertzeko. Gainera, uste du Baionako suprefetak Hendaiako Herriko Etxeari bidalitako gutunak zabaldutako gatazkari aterabide bat eman diezaioketela "etorkizun laburrean gauzatzekoak diren lege testuek"; horien artean aipatu ditu hezkuntzari buruzko lege ekimena, deszentralizazioari buruzkoa eta "berrestekoa den eskualde hizkuntzen Eurokarta, tokiko aginteei inbertsioen finantzatzeko ahalmena emanez".
Seaskako ordezkariak Paueko Prefeturan izan ziren atzo. Bileran, Baionako suprefetak Hendaiako Herriko Etxeari igorritako gutunak ideki krisiaz mintzatu ziren. Gutun horretan, suprefetak herriko etxeari ohartarazi zion ezin duela Seaskaren ikastola baten eraikina finantzatu, XIX. mendeko Allauxlegean oinarrituta. Horrek arriskuan jartzen du Ipar Euskal Herriko ikastolen sare osoa, Seaskaren ustez.
Bilkuran eginiko proposamenaren berri eman du gaur Maitiak, ohar baten bidez. Ohartarazi du Seaskak "rol estrategikoa" duela "hiztun osoen sortzea helburu duen hizkuntza politikan", eta, testuinguru horretan, "gaurko koadro legalaren interpretazio hertsia" ez dela egokia "ikastoletako egoitzei lotu inbertsio proiektuen aztertzeko".
Estatuko ordezkarien aldetik jarrera "adikorra" eta Hendaiako ikastolarentzat "aterabide baten zentzura joateko zinezko borondatea" nabaritu zuen Maitiak.
