Denis Itxaso San Markoko Mankomunitateko presidenteak azaldu duenez, Igeldok urtean 50.000 euro inguru ordaindu beharko lituzke, San Markoko zabortegia zigilatzeko ekarpenaz gain.
Itxasok bi gai argitzeko eskatu die Igeldoko ordezkariei, hala nola gaikako bilketako eta birziklatzeko zerbitzuak kontratatu behar ote dituzten eta mankomunitatean udalerri gisa sartzea aurreikusten ote duten: "Hori argitzea ezinbestekoa da jakiteko Igeldok, Donostiaren zati zen aldetik, jasotzen zituen zerbitzuetatik zein hartuko dituen bere gain, baita zer kontratazio erregimen izango duen eta egoera berriak zer obligazio ekonomiko ekarriko dizkion argitzeko ere".
Era berean, zabortegia behin betiko zigilatzearen gastuak "dagokien neurrian eta proportzioan" beren gain hartzeko eskatu die Itxasok: “Igeldoko zaborrak zabortegi horretan bota dira hainbat urtetan, eta bidezkoa da hango gastuan Donostialdeko bizilagun guztien proportzio berean parte hartzea”
Itxasok azaldu du mankomunitateak gai horren inguruko polemika alde batera utzi eta "toki‑erakunde berriaren obligazioen ordainketa" argitu nahi duela soilik.
