Maria Asuncion Vitorica ez dago koma larrian

Maria Asuncion Vitorica, astelehenean Yemenen atentatuan zauritutako euskal herritarra (Amurrio, Araba) ez dago koma larrian, haren senideek jakinarazi dutenez. Vitorica ingresatuta dagoen ospitaleko medikuek atzo zabaldu zuten hura koma larrian dagoela, baina haren ahizpa bat eta anaia bat atzo gauean iritsi ziren Sana hiriburura, eta egoera hain-hain larria ez dela esan zien mediku espainiar batek.

Hala ere, hark koman segitzen du, "koma arinean", senideek adierazi dutenez. Medikuek esan dute atzotik oso gutxi egin duela hobera. Astearte gauean bigarren aldiz operatu zuten. Buruan metraila dauka eta, espainiar medikuak haren anaiari eta ahizpari aipatu dienez, ordu hauek "erabakigarriak" izango dira aurrera irteten duen jakiteko. Horren arabera erabakiko dute Yemendik atera edo ez.

Mikel Burzako Eusko Jaurlaritzaren ordezkariak lagundu zien atzo Vitoricaren anaiari eta ahizpari, baita Espainiako Poliziaren eta Guardia Zibilaren hirunak kidek, eta espainiar mediku batek ere.

Atentatuan bederatzi lagun hil zituzten. Haien artean, bi euskal herritar: Mikel Essery eta Maddi Alvarez zarauztarrak (Gipuzkoa). Bien gorpuak atzo iritsi ziren Yemendik Madrilera, autopsia egin zieten, eta gaur heldu dira Euskal Herrira. Essery 13:00ak aldera lurperatu dute Aiako (Gipuzkoa) hilerrian, eta 19:30ean hileta elizkizuna egingo dute, Donostian -hemen bizi zen-, San Bizente elizan. Alvarez, berriz, erraustu egingo dute bihar goizean Donostian, eta bitartean Zarauzko tanatorioan edukiko dute.

Vitoricaz gain, beste hiru euskal herritar zauritu ziren: Begoña Larrabeiti, Eva Maria de Mena eta Maria Estibaliz Diez del Rio. Lehen biei senda-agiria eman zieten atzo, baina Diez del Riok gaur ere Gomez Ulla ospitalean (Madril) egon beharko du, belauneko zauriak sendatzen.