Euspot euskarazko iragarki laburren lehiaketako sariak banatu berri dituzte Aretxabaletan (Gipuzkoa). Markos Goikolea iruindarrak eskuratu du lehenengo saria, Bakoitzak berea. Sarean euskaraz lanari esker.1.000 euroko saria irabazi du Goikoleak.
Bestetik, publikoaren saria Aitor Abaroa lekeitiarrak irabazi du, Ixi Boards izeneko iragarkiarekin. www.euspot.eu webgunean bozkatu ahal izan dute lanik onena bost egunez. Guztira, 1.307 boz jaso dituzte, eta horietatik 373 garailearentzat izan dira. Bostehun euroko saria irabazi du Abaroak.
Mondragon Unibertsitateko ikasleen spot-ik onena, berriz, Amaia Urteaga beasaindarrak irabazi du. Euskara sarean #datsegit iragarki laburra ekoitzi du Urteagak, eta 500 euroko saria jaso du. Hemezortzi urtez azpiko lehiakiderik ez da aurkeztu, eta beraz, laugarren saria hutsik geratu da.
Mondragon Unibertsitateak, Aretxabaletako Udalak eta Arteman Komunikazioa Elkarteak iaz antolatu zuten estreinakoz euskarazko spot lehiaketa. Iazkoarekin alderatuz asko handitu da parte hartzea; dozena bat lan aurkeztu zituzten iaz, eta aurten, berriz, 22 lagunek parte hartu dute. Euskarazko sormena bultzatzeko eta hizkuntzaren erabilera arlo guztietara zabaltzeko helburuarekin sortu zuten Euspot.
