Gasteizko Udaleko alkate Javier Marotok ez du aintzat hartuko gaur udaleko osoko bilkuran onartutako mozioa, ez dagoelako horrekin ados. Gaur Gasteizko Udalean akordioa egin dute 'Parot doktrina' deusezteko, eta aplikatu zaien euskal presoak askatzeko eskatuz. Bilduk aurkeztutako mozioak koalizioko sei ordezkarien botoa eta EAJren beste sei ordezkarirena jaso du.
PPk kontrako botoa eman du, baina berez bederatzi ordezkari dauden arren bost soilik zeuden gaur osoko bilkuran — Maroto ez zegoen— , eta PSE-EEk ere aurkako botoa eman du, baina beste bost ziren. Beraz, osoko bilkuran, aldeko hamabi botorekin eta aurkako hamarrekin mozioa onartu dute.
Ohar baten bitartez Marotok jakinarazi du, ez dagoela onartutakoarekin ados eta ez duela aurrera eramango testuak eskatutakoa. Hau da, ez herritarrei, ezta Europako Auzitegiko arduradunei ere, ez die bilkuran erabakitakoa helaraziko.
