LOMCEren azterketak indargabetzeko prozesua abiatuta dago Espainiako Diputatuen Kongresuan, baina PPk bereari eusten dio. LOMCE indarrean dagoela azpimarratu du Iñigo Mendez de Vigo jarduneko Hezkuntza ministroak, eta, beraz, LHko 6. mailako azterketa egin egin behar dela nabarmendu du: "Espainian legeak bete egiten dira", esan du Ser irratian egin dioten elkarrizketan.
Cristina Uriarte Jaurlaritzako Hezkuntza sailburuak Euskadi Irratian hitz egin du gaur, eta hark esan du ez dela joango arratsaldean Madrilen egitekoak diren biletara. Azterketa hori ez egiteko asmoari eutsiko dio Jaurlaritzak, Uriarteren arabera, eta, gauzak horrela, bere arabera "ez du zentzurik nola egingo den aztertzeko bilerara joateak".
Uriartek gogora ekarri du "modelo pedagogiko propioa" garatzeko lanean ari dela Jaurlaritza, eta horren araberako azterketa egitea gauza bat dela, eta beste bat Madrildik agintzen den azterketa egitea. Nabarmendu du ez dutela egingo Espainiako Gobernuak agintzen duena, eta, Jaurlaritzak bere azterketa antolatzeak denbora eskatzen duenez, argitu du "aurten behintzat ez" dela aurreikusten.
Nafarroako Foru Gobernuak ere ez du LH amaierako etsamina egiteko asmorik.
