PSE-EEko zuzendaritza batzartu da arratsaldean, EAJk EH Bildurekin gobernu akordioa osatzea "ezinezko" jo ostean. Bertan, EAJren eta PSE-EEren arteko negoziazioen egoeraren berri eman die Mendiak zuzendaritzako kideei.
Bi alderdiek hizketan jarraitzen dute gobernu akordio bat lortzeko, eta bide horretan "aurrerapausoak" eman dituztela aitortu du Mendiak. Hala ere, azaldu du oraingoz ez direla ados jarri eta gai batzuk negoziatzeke dituztela.
Mendiaren esanetan, negoziazioek aurrera egin ahala eta akordioa lortzeko aukeraren aurrean, hori zuzendaritzaren eta Batzorde Nazionalaren aurrean aurkeztuko luke PSEk. Akordioa datozen egunetan zehaztuz gero, PSEren Batzorde Nazionalak datorren astelehenean egin lezake hurrengo batzarra, alderdiko iturriak aipatuz Europa Press agentziak argitaratu duenez.
