Egitasmoari ezezkoa ematen dion laugarren udalerria da Miarritze, eta bertako 24.993 bizanleak hirigune elkargo bakarraren aurkakoen multzoari batu zaizkie; 32.000 dira ezezkoak guztira. Baiezkoak, ordea, hogei udalerri dira, eta Hazparneko, Muskildiko eta Mugerreko herriko etxeek baiezkoa eman ostean, 120.000 bat herritar ordezkatzen dituzte. 147.967 lortu behar ditu proiektuak.
Hazparnek #HELEP-aren alde bozkatu du https://t.co/DHE0RJTllG 115.000 biztanle jada elkargo bakarraren alde pic.twitter.com/ZIUbGaXoKw
— Berria.eus (@berria) 2016(e)ko apirilak 7
Michel Veunac auzapezak hirigune elkargo bakarraren aurka bozkatu du, eta hura izan da hitza hartzen lehena. Azaldu du Ipar Euskal Herriaren ezagupenari "hertsiki atxikia" dela, baina uste du proiektua "aldarrikapen bati ematen zaion erantzun teknokrata" dela: "Gobernantza kasik ezinezkoa izanen da, herritarrek administraziotik urrunduko ditu".
Elkargo bakarra Lurralde Elkargoarekin alderatu du Veunacek behin baino gehiagotan: "Estatuaren ezezkoa gordetzeko maniobra da".
Miarritzez, Mugerrez eta Hazparnez gain, gaur hartu dute hirigune elkargo bakarrari buruzko erabakia Irisarrik eta Muskildik.
Hurrengo bozketak
Datorren astean bozketa gehiago izango dira; hirigune elkargo bakarraren inguruan erabakiko dute Lehuntzek eta Makeak astelehenean, Aiziritzek, Azkaratek eta Baigorrik asteartean, Arberatzek, Donapaleuk eta Bastidak asteazkenean eta Behaskanek ostegunean.
