Adolfo Muñoz Txiki ELAko idazkari nagusiak sindikatuaren izenean hitz egin zuen atzo, eta nazioarteko ordezkarien aurrean mugarik gabeko eztabaida politikoa legezkoa dela defenditu zuen. "Hori da guk defenditzen duguna, politiko eta sozialki indarrak biltzea oraingo estatus politikoa aldatzeko. Zibil eta demokratikoki, noski".
Bere txanda eskerrak emanez hasi zuen Muñozek, eta zorte ona opa zien nazioartekoei ETAk eta estatuek eskaerak onar ditzaten. "Normalizazio politikoa lortzeko zuek esaten duzuena ontzat eman behar dute bai batzuek eta bai besteek".
Giza eskubideen arloan urrats "sendoak" eman behar direla argudiatu zuen, presoen eta atxilotuen eskubideak eta biktimenak aitortuz. "Asko dago egiteke, asko dago gatazka hau leundu ahal izateko". Gainera, "biolentziaren aitzakian" Espainian legeak aldatu eta epaitegi politikoak erabili direla salatu zuen.
