Larunbatean izango da Nafarroako Bertsolari Txapelketako finala, Iruñeko Anaitasuna kiroldegian, 17:00etatik aurrera. 31 izan ziren txapelketa hasi zuten bertsolariak, eta horietatik zortzi igoko dira larunbatean oholtzara: Julio Soto, Xabier Silveira, Erika Lagoma, Jon Barberena, Eneko Lazkoz, Eneko Fernandez, Oskar Estanga eta Aimar Karrika.
Finaleko lehen lau sailkatuek, gainera, udazkenean jokatuko den Txapelketa Nagusirako txartela lortuko dute.
Orain dela bi urteko finalarekin alderatuta, hiru bertsolari berri izango dira finalean: Erika Lagoma, Aimar Karrika eta Eneko Fernandez. Lagomak badu esperientzia finaletan, 2006tik 2009ra lau finaletan egon baita.
Finalerako sarrerak salgai daude webgunean, baita Nafarroako hainbat lekutan ere: Iruñean (Karrikiri denda), Elizondon (Fantxike denda), Etxarri Aranatzen (Xapatero taberna), Lekunberrin (Lanbroa liburudenda), Leitzan (Maimur liburudenda) eta Lesakan (Okindegia).
