Nafarroako Derrigorrezko Bigarren Hezkuntzako Irakasleen Elkarteak hasierako asmoari eutsi dio, eta greba mugagabea hasi du gaur, Nafarroako Gobernuak "inposatutako" murrizketen aurrean. Irakasleen arabera, neurri horiekin hezkuntzaren kalitatea "okertu" egingo da.
Murrizketak "irakasleen lan baldintzen aurkako erasoa" ere badirela uste dute DBHko irakasleek, gaur goizean Iruñean Alberto Royo, Elena Senosiain eta Juanma Ruiz ordezkariek azaldu dutenez.
"Irakasleak apur bat nekatuta gaude gure aldarrikapenei uko egin behar izatearekin, ikasleen mesedetan. Heldu zaigu honi aurre egiteko unea", adierazi dute.
Nafarroako irakaskuntzako sindikatuek hiru greba egunetara deitu dute, biharko, hilaren 29rako eta 31rako. Elkarteak uste du protesta hori ez dela eraginkorra izango, eta horregatik erabaki dute greba mugagabea egitea.
