Nafarroako Gobernuak auzitara joko du Ultzamako biogas plantaren arduradunen aurka, "proiektua diru laguntza publikoekin finantzatzeko garaian izandako jokabideak delitu edo lege-urratze zibilak izan ote ziren jakiteko".
Izan ere, "irregulartasun ugari" antzeman ditu gobernuak plantaren finantzaketa publikoaren txostenetan. Zehazki, diru laguntzen iruzur, dokumentuen faltsutze, diru publikoen erabilera bidegabe, prebarikazio eta iruzur delituen zantzuak aurkitu dituzte: "Departamentuen espedienteak eta Kontuen Ganberak eginiko txostena aztertuta, Nafarroako Gobernuak ulertzen du finantzaketa bikoitza egin zela biometanizazio plantaren eraikuntzan".
Zehazki, gobernuaren ustez, proiektuaren kostua baino 1.138.837,78 euro gehiago ordaindu zituen enpresak. "Kontuen Ganberaren txostenaren arabera, kontratazio publikoko araudia era larrian urratu zuten Ultzamako Udaleko arduradunek, eta fakturazio bikoitza antzeman zuten biogas plantaren eraikuntzan".
Nafarroako Legebiltzarrean ere, abian da Ultzamako biogas plantari buruzko ikerketa batzordea. Datozen asteetan hasiko dira arduradun politikoen agerraldiak.
