Bilduk eta Aralar-Nabaik oso larritzat jo dute Nafarroako Hezkuntza Departamentuak Espainiako Gobernuak antolatutako militar espainiar bati gutuna izeneko lehiaketan parte hartzera deitu izana. Bi talde parlamentariek mozio bat aurkeztu dute, lehiaketa antolatu izana gaitzes dezan legebiltzarrak.
"Hezkuntza eremuan militarismoaren baloreak bultzatzen dituen lehiaketa hau Hezkuntza Departamenduak antolatu izana oso larria da. Ez du inolako hezkuntza helbururik eta bai helburu ideologikoa; izan ere, Defentsa Ministerioak lanak aukeratuko baititu", ohartarazi dute.
Mozio horretan Nafarroako Gobernuari eskatu diote deialdi horren inguruko iragarkiak kentzea, "erabat ideologikoa" delakoan: "Ez dago bideratuta hizkuntza gaitasunak lortzeko, ezta baloreen hezkuntzan ezta elkarbizitza baketsuan ere".
