Azaroaren 18an hasiko da Yolanda Barcina Nafarroako Gobernuko presidenteari tartak jaurti zizkioten lau lagunen kontrako epaiketa, eta haiei elkartasuna adierazi diete Mugitu plataformako bi kidek gaur.
Nafarroako Jauregiko balkoian dauden Espainiako eta Europako banderetan kateatu dira, eta Espainiako bandera kendu behar izan dute protestan ari zirenetako bat bertatik eramateko. Biak atxilo eraman dituzte foruzainek. Behean, ehunka lagun batu dira kateatuei eta tartalariei babesa agertu eta abiadura handiko trenaren kontra oihukatuz.
2011ko urrian, Pirinioen Lan Batzordearen bilkura batean (Tolosan, Okzitanian), tartak jaurti zizkioten Barcinari, abiadura handiko trenaren egitasmoaren kontra protesta egiteko.
