Enrique Goñi Banca Civicako eta Nafarroako Kutxako presidente ohiak bihar emango ditu azalpenak bi entitateetan eginiko kudeaketaren inguruan, eta froga gisa agerraldira hainbat agiri eramateko eskatu dio Goñiri Kontuz Nafarroako Kutxako bezeroen plataformak.
Besteak beste, ondoko agiriak aurkeztea galdegin dio Kontuz-ek Goñiri: Kutxako zuzendaritzako kideen 2002tik 2012rako soldata; lansari horiek onartu zituzten organoetako aktak; 2007tik 2009ra erositako lokal eta lur eremuen erosketa bermatzen zuten merkatu azterketak; eta 2002tik 2012rako Administrazio Kontseiluen aktak.
Agiri horiek talde parlamentarioei aurkezteko eskatu du plataformak. Halaber, Goñik hainbat galdera erantzutea nahi du Kontuz-ek. 28 galdera egin dizkio guztira; segidakoak dira batzuk: "Zein izan zen Goñi jaunaren urteko soldata Nafarroako Kutxan sartu zenetik? Kontratu blindatua al zuen kaleratua izanez gero? Zergatik igaro zen Nafarroako Kutxa bost zuzendariorde izatetik hogei izatera Goñi jauna zuzendari zen urteetan?".
Gainera, plataformak oroitarazi du elkarretaratzera deitu dutela bihar goizeko hamarretarako Nafarroako Parlamentuaren aurrean, Goñiri "egia" eskatzeko.
