Abenduko lansaria ordaindu die Nafarroako Parlamentuko 50 funtzionarioei parlamentuak berak. Ganberako langileen estatutua aldatu bitartean Espainiako Gobernuaren dekretua ez dela aplikatu behar argudiatuta hartu zuen erabakia atzo Parlamentuko Mahaiak, UPN, PSN, Bildu eta Nafarroa Bai-ren aldeko botoekin. Nafarroako Parlamentuko presidente Alberto Catalan izan zen aurkako botoa eman zuen bakarra.
Horrez gain, erabaki zuten urtea amaitu aurretik langile publikoek behin-behineko gehigarri bat jasotzea, eta hori egiteko aukera egongo ez balitz, uztaileko lansaria urtarrilaren hasieran jasotzea. Yolanda Barcina Nafarroako Gobernuko presidenteak adierazi zuen gobernuak ez duela abenduko lansaria ordainduko, "ez duelako egin behar, eta ezin duelako", estatuaren legeek hori debekatzen dutelako.
