Arnaldo Otegi Bateragune auziko presoaren defentsak eskatu zuen auzitik kanpo uzteko Antonio Narvaez Konstituzionaleko magistratua, "zuzenean edo zeharka" parte hartu duelako auzian. Zehazki, azpimarratu zuen Goreneko fiskala zenean Sortu legez kanpo uzteko eskatu zuela eta, horretarako, Bateragune auziarekin loturiko erreferentziak erabili zituela.
Konstituzionalak aho batez erabaki du eskaera hori aintzat ez hartzea. Eskaera aztertu bitartean, geldirik egon da Bateragune auziko babes helegitearen azterketa. Narvaezen errekusazioa erabakita, orain berriro ekingo diote Konstituzionaleko osoko bilkura osatzen duten epaileek babes helegitea aztertzeari. Gaur dute oporren aurreko azken saioa, eta auzitegiko iturriak aipatuz zenbait agentzi eta hedabidek diote gaur hartuko dutela erabakia.
Horrela egin ezean, irailera atzeratuko litzateke.
