NATOko kide izateari ezetz esan zioten Hego Euskal Herriko herritarrek orain dela 30 urte. Bozketa hartako emaitzak gogorarazi dituzte Bilbon eginiko mobilizazioan, nabarmenduz Euskal Herriaren "gehiengoak baztertu" zituela "NATO eta gerrak".
Protestan, elkartasuna adierazi diete "estatuek eta NATOk bezalako erakunde militaristek sustatutako gerren eta gatazken eraginez beren herrialdeetatik ihes egin beharrean" daudenei. Gainera, azpimarratu dute NATO "oztopo gero eta handiagoa" izan dela bake bidean.
Donostian, berriz, TTIP Inbertsio eta Merkataritza Lankidetza Transatlantikoaren aurka egin dute protesta. "NATO ekonomikotzat" jo dute, eta ohartarazi "duela 30 urte NATOri" esan bezala esaten diotela ezetz TTIPari. Izan ere, kritikatu dute "onuradunak beti berdinak" direla eta kalte egiten diela, besteak beste, demokraziari eta zerbitzu publikoei.
