NATOren 30. urteurrena baliatu nahi dute Nafarroako hainbat eragile sozialek, "egungo eredu inperialista eta kapitalista" salatzeko. Hori dela eta, "Atzo bezala gaur ere... NATOri ez! Nafarroak erabaki!" izeneko manifestua aurkeztu dute Iruñean, eta mobilizazioak iragarri dituzte heldu den asterako.
Hala, hilaren 11n, elkarretaratzea eginen dute Tuteran, eta horren ostean, erreferendum bat irudikatuko dute, Josu Osta ekintzaile altermundistak azaldu duenez, "duela 30 urte bezalaxe NATOri ezetz esaten diogula adierazteko".
Martxoaren 12arako, berriz, bi hitzordu antolatu dituzte Iruñean: alde batetik, NATOren eta TTIP itunaren arteko paralelismoei buruzko mahai inguru bat, 12:00etan Kondestable jauregian; bestetik, giza kate bat 17:30ean, kartzela zaharraren orubean.
Dagoeneko, 35 pertsonek izenpetu dute manifestua, baina datozen egunetan sinadura gehiago bildu nahi dituzte sustatzaileek.
