Larunbatean hasi eta datorren asteko ostegunera arte egingo dute Euskal Herriarekiko Elkartasun Astea nazioarteko 25 hiri baino gehiagotan. Zazpigarren edizioaren ardatz nagusia euskal preso eta iheslarien egoera izango da. Askapena erakunde internazionalistak eta Euskal Herriaren Lagunak taldeak antolatutako elkartasun astean parte hartuko dute Euskal Herriko hainbat erakundek. Besteak beste, Bilgune Feminista, Etxerat, Herrira, Euskal Herrian Euskaraz, Ahaztuak, Ikasle Abertzaleak, Gazteak, Elkartzen eta Askapenako kideak izango dira antolatuko diren hitzaldi eta mahai inguruetan.
Euskal Herriko gatazkaren konponbide prozesuari mintzatuko dira talde horietako kideak, "eraikuntza sozial eta nazionaleko borrokak uztartuz". Halaber, jakinarazi dute euskal presoen “bitartekari” talde batek ere parte hartuko duela, presoen egoeraren berri emateko. Horrekin batera, Barrura begiratzeko leihoak dokumentala proiektatuko dute hainbat lekutan. Azkenik, asteari amaiera emanez, hainbat elkarretaratze egingo dituzte Espainiako eta Frantziako estatuek euskal presoei ezartzen dizkieten “salbuespen neurriak” eta, bereziki, Espainiako Auzitegi Gorenaren 197/2006 doktrina salatzeko.
