Jose Manuel Soria Espainiako Industria ministroak atzo egindako adierazpenen ondoren, ohar bat kaleratu du arrats honetan Nuclenor enpresak, Garoñako zentral nuklearraren jabeak. Ministroak adierazi zuen uztailaren 6an itxi egin beharko dutela zentrala, nabarmenduz ixte hori soilik "arrazoi ekonomikoei" dagokiela. Orain, ministerioa zirrikituren baten bila ari da legean; izan ere, legeak dio "arrazoi teknikoengatik" itxi daitekeela zentral bat.
Nuclenorrek berretsi du atzo ministroak esandakoa: "Soilik arrazoi ekonomikoei dagokie jarduna geratzea". Hartara, "baldintzek hori ahalbidetzen badute", enpresa prest dago baimena eskatzeko. Urrats hori ezinbestekoa litzateke Espainiako Gobernuak lizentzia emateko.
