NUPeko langileen bi herenek grebarekin bat egin dutela adierazi dute sindikatuek

«Erantzun handia izan du». Horrela baloratu du LABeko kide Karlos Ibañezek NUP Nafarroako Unibertsitate Publikoko administrazioko eta zerbitzuetako langileek atzo egindako greba. Langileen %65ek bat egin zuten lanuztearekin, sindikatuen arabera. LABek, ELAk, CCOOk, UGTk eta CGTk antolatu zuten mobilizazioa, unibertsitateak langileen ordutegian egin nahi dituen aldaketak salatzeko. Unibertsitatearen arabera, langile gutxiagok egin zuten greba: goizeko txandan, %47k. NUPeko langile gehienak aritzen dira goizez (482tik 437). Sindikatuen hitzetan, aldiz, 300 langilek baino gehiagok erabaki zuten lanera ez joatea. «Elkarretaratze jendetsuak egin ditugu; horrek erakusten du langileak haserre daudela, eta gauzak aldatzea nahi dutela», erran zuen Ibañezek, eta negoziazioak berriz martxan jartzeko aukera izanen den itxaropena agertu du.

Unibertsitateak langileen ordutegian egin nahi dituen aldaketekin ez daude ados. Bost besta egun kendu nahi dizkiete, eta iraileko lan jardunaldiaren murrizketa bertan behera utzi.