Lourdes Goikoetxea Nafarroako Ekonomia kontseilariak espero du ogasun departamentuan beste inork dimisioa ez ematea, Idoia Nieves ogasun zuzendari ohiak eta Manuel Arana zuzendariordeak dimisioa eman eta gero: "Gertatutakoak atsekabetu arren, aitzinera begiratu behar dugu".
Atzo aurkeztu zuen dimisioa Aranak, Ekonomia Departamentuak Efe berri agentziari baieztatu zionez. Iturri horien arabera, departamentuan egiten ari diren berrantolaketen harira aurkeztu du dimisioa Aranak.
Nievesek dimisioa eman eta bi egunera, gauza bera egin du Aranak. Nafarroako Gobernuak eman zuen Nievesen dimisioaren berri, eta "Ekonomia eta Ogasun Departamentuaren berrantolaketa zabalago batean" kokatu zuen dimisioa. Gobernuan azaldu zuen zerga erreformari eta itun ekonomikoaren berritzeari heldu nahi diola 2014an, eta horri begira egin dituela aldaketak.
Atzo, ordea, Goikoetxeak aitortu zuen "desadostasunak" eta "diru sarrerek sortutako tentsioak" zirela medio aurkeztu zuela dimisioa Nievesek.
